Այսօր Արևմտյան դպրոցում մեկնարկեց 2-5-րդ դասարանցիների մուտքի ճամբարը, որը ղեկավարում է Սոնա Փափազյանը: Օրը հետաքրքիր ու բազմաբովանդակ էր: Շատ բան հասցրեցինք սովորել, նախ ծանոթացանք միմյանց հետ , հետո շրջայց կատարեցինք դպրոցով, մասնակցեցինք ընդհանուր պարապմունքին, տիկին Սոֆյան մեզ սովորեցրեց երկու նոր երգ, երկու պար: Եղանք Ագարակում, ծանոթացանք մեր չորքոտանի ընկերների հետ, հետո մի լավ զովացանք լողավազանում, լողացինք, արևայրուք ընդունեցինք, հեծանիվ վարեցինք: Վերջում ընկեր Սոնան ներկայացրեց մեր կայքը, ենթակայքերը, սովորողները իրենց նոր ընկերներին պատմեցին ու ցույց տվեցին, թե ինչպես են նյութ հրապարակում կայքում, ներկայացրեցին իրենց բլոգները: Շատ տպավորված ետ վերադարձանք դպրոց:
Այսօր մեկնարկեց կրթահամալիր այլ դպրոցներից ընդունված 2-5-րդ դասարանցիների «Մուտքի» ճամբարի առաջին օրը: Ճամբարականները տասնվեցն էին՝ աշխույժ, շողացող աչքերով, իրենց նոր աշխարհով՝ կրթահամալիրով հետաքրքրված: Օրը սկսել ենք Արևմտյան ճամբարի հետ լողափնյա ընդհանուր պարապմունքով, մարզական հատվածը՝ վստահելով նոր սովորողներին: Շրջեցինք Արևմտյան դպրոցում, ծանոթացանք տարածքի հետ, խնամեցինք բույսերը, ջրեցինք: Շատերի մոտ հարց էր ծագում՝ ինչու՞ արևելյան, արևմտյան դպրոցներ և կամ Սեբաստացի կրթահամալիր…: Այդ հարցի պատասխանն էլ ստացան, իմացան, որ իրենցից յուրաքանչյուրը սովորելու է Արագած լեռան չորս գագաթներին համապատասխան մի բևեռում , և որ իրենք շատ կարևոր կողմերն են Հայաստանի ամենաբարձր կետի: Շատերը, շախմատ խաղալ գիտեին և սիրով խաղում էին, մինչև կգային իրենց ճամբարական ընկերները: «Հակաբացիլ Կոմիտաս»-ի երգացանկից բոլորին ծանոթ էր «Արև-Արև՜» եգը, և տիկին Սոֆյայի նվագակցությամբ ու օգնությամբ շատ արագ ընկալեցին երաժշտությունը ու սկսեցին երգել: Սիրեցին Բարեկենդանի երգը՝ «Գնացեք տեսեք»-ը, Թամզարա պարը: Զարմացան, որ առավոտյան մենք պարով ու երգով ենք բարև ասում միմյանց: Բոլորը սեբաստացուն վայել հանդերձանքով էին՝ խուրջինով, գկխարկով, բերել էին լողազգեստներ և անհամբեր էին, ուզում էին միանգամից ամեն հնարավոր բան արագ անել ու լողալ: Մինչև լողալը, ծննդյան տոն ունեինք՝ Արևելյան դպրոցից Աշոտի 10ամյակն էր, շնորհավորեցինք ու այդքան սպասված լողի ժամը եկավ: Հմուտ լողորդները ավելի շատ էին, Արևելյան դպրոցից ՝ Պողոսը և Դավիթը, Հարավային դպրոցից՝ Ալլան, զարմացրին լողորդի իրենց հմտություններով:
Ուսումնական բաց ճամբարներ, «Մուտք» ճամբար 2017-2018 